Saltzen al du zure itxurak? Branding Pertsonala estrategia gisa

Ekingunek abian jarri ditu, gaur, otsailak 1etik hasita, bazkideentzako barne-prestakuntza jardunaldiak. Hilaren lehenengo astelehenetan, elkartearen talentu guztia ikusgai egiteko balioko duen eta elkarteko kide guztien garapen profesionalerako baliagarriak izango diren jardunaldiak eskainiko ditu Ekingunek.

Lehenengo saio honen izenburua “Saltzen al du zure itxurak? Branding Pertsonala estrategia gisa” izan da. Leire Berasaluzek eman du hitzaldia, Sare Translations-ekoa eta Ekinguneko presidente hautatu berriak, alegia.

Bere hitzetan, “bizi dugun egoera zalantzaz beteta dago. Ezinbestekoa da, beraz, gure lehiakideetatik bereizten lagunduko digun estrategia bat izatea.

Prezioetan bakarrik oinarritutako lehiakortasunak enpresa txikiak hondoratzen ditu. Hauek besteengatik bereiziko dituzten balioak bilatu beharko lituzkete.

Saltzeko, ezinbestekoa da bezeroarekin konektatzea. Bezeroak gugan sinestu behar du, baina nola lor dezakegu hori?

Funtsezkoa da benetakoak izatea eta gure itxura gure identitate edo nortasunarekin bat etortzea”.

Saioan zehar hainbat jarduera egin dira eta ondorioak bazkideen iritzia eta emaitzak ezagutzeko barne-formulario bat egiteko oinarritzat hartu du elkarteak, Ekinguneren balioak hobeto zehazteko eta ezagutzera emateko erabiliko dena.

Giro atsegin eta lasaian, elkarteko kideek euren iritziak eta ideia interesgarriak ekarri dituzte. Haiek entzun eta hurrengo saioak antolatzeko erabiliko ditu guztiak Ekingunek.

Hurrengo saioa martxoaren 1ean izango da. Zatozte.